🤍✨🕌📿⭐️ سیرت النبی ﷺ قدم بقدم 🌴48🌴
سرکارِ مدینیہ، سیدِ دو عالم ﷺ کی سیرت کا مکمل اور مفصل تذکرہ
☼الکمونیا ⲯ﹍︿﹍میاں شاہد﹍︿﹍ⲯآئی ٹی درسگاہ☼
✍🏻 عبداللہ فارانی
☰☲☷ گذشتہ سے پیوستہ ☷☲☰
*ⲯ﹍︿﹍︿﹍ⲯ﹍ⲯ﹍︿﹍☼*
قبلہ کی تبدیلی، منبر کا واقعہ، اور غزوہ بدر کی تیاریاں
🕋 قبلہ کی تبدیلی کا اعلان
حضرت عباد بن بشر رضی اللہ عنہ نے بھی یہ نماز حضور نبی کریم صلی اللہ علیہ و سلم کے ساتھ پڑھی تھی — یہ مسجد سے نکل کر راستے میں دو انصاریوں کے پاس سے گزرے — وہ نماز پڑھ رہے تھے اور اس وقت رکوع میں تھے — انہیں دیکھ کر عباد بن بشر رضی اللہ عنہ نے کہا:
"میں اللہ کی قسم کھا کر کہتا ہوں کہ میں نے ابھی آنحضرت صلی اللہ علیہ و سلم کے ساتھ کعبہ کی طرف منہ کر کے نماز پڑھی ہے۔"
قبا والوں کو یہ خبر اگلے دن صبح کی نماز کے وقت پہنچی — وہ لوگ اس وقت دوسری رکعت میں تھے کہ منادی نے اعلان کیا:
"لوگو! خبردار ہو جاؤ! قبلے کا رخ کعبہ کی طرف تبدیل ہو گیا ہے۔"
نماز پڑھتے ہوئے لوگ قبلے کی طرف گھوم گئے — اس طرح مسلمانوں کا قبلہ بیت اللہ بنا۔
🌙 رمضان کے روزے اور صدقۂ فطر کا حکم
اسی سال یعنی 3 ہجری میں رمضان کے روزے اور صدقۂ فطر کا حکم نازل ہوا۔
🪵 منبر کا واقعہ — کھجور کے تنے کا رونا
پھر مسجد نبوی میں منبر نصب کیا گیا — جب تک منبر نہیں بنا تھا — آپ صلی اللہ علیہ و سلم کھجور کے ایک تنے سے ٹیک لگا کر کھڑے ہوتے تھے اور خطبہ دیتے تھے۔
جب منبر بن گیا اور آپ صلی اللہ علیہ و سلم نے کھجور کے اس تنے کی بجائے منبر پر خطبہ ارشاد فرمایا — تو وہ تنا رونے لگا — اس کے رونے کی آواز ایسی بلند ہوئی کہ تمام لوگوں نے اس آواز کو سنا — آواز اس قدر دردناک تھی کہ ساری مسجد ہل گئی — وہ اس طرح رو رہا تھا جیسے کوئی اونٹنی اپنے بچے کے گم ہونے پر روتی ہے۔
اس کے رونے کی آواز سن کر آنحضرت صلی اللہ علیہ و سلم منبر پر سے اتر کر اس کے پاس پہنچے اور اسے اپنے سینے سے لگا لیا — اس کے بعد اس میں سے ایک بچے کے سسکنے کی آوازیں آنے لگیں — حضور اکرم صلی اللہ علیہ و سلم نے اس پر پیار سے ہاتھ پھیرا اور فرمایا:
"پرسکون اور خاموش ہو جا۔"
تب کہیں جا کر اس کا رونا بند ہوا — اس کے بعد آپ صلی اللہ علیہ و سلم نے اس تنے کو منبر کے نیچے دفن کرنے کا حکم دیا۔
آپ صلی اللہ علیہ و سلم نے ایک بار ارشاد فرمایا:
"میرے گھر اور میرے منبر کے درمیان کی جگہ جنت کے باغوں میں سے ایک باغ ہے۔"
یعنی یہ مقام جنت ہی کا ایک مقام ہے — اللہ تعالیٰ نے اس مقام کو جنت میں شامل کر دیا ہے۔
⚔️ غزوہ بدر کا پس منظر — قافلے کی خبر
گزشتہ صفحات میں آپ پڑھ چکے ہیں کہ قریش کے ایک تجارتی قافلے پر حملے کی غرض سے آپ صلی اللہ علیہ و سلم روانہ ہوئے تھے — لیکن جب آپ صلی اللہ علیہ و سلم عشیرہ کے مقام پر پہنچے — تو قافلہ اس مقام سے گزر کر شام کی طرف روانہ ہو چکا تھا — چنانچہ آپ صلی اللہ علیہ و سلم واپس تشریف لے آئے تھے۔
پھر جب آپ صلی اللہ علیہ و سلم کو اطلاع ملی کہ وہ قافلہ شام سے واپس آ رہا ہے — اور اس سامانِ تجارت کا منافع مسلمانوں کے خلاف استعمال ہوگا — اس لیے آپ صلی اللہ علیہ و سلم نے حکم دیا:
"قریش کا تجارتی قافلہ آ رہا ہے — اس میں ان کا مال و دولت ہے — تم اس پر حملہ کرنے کے لیے بڑھو — ممکن ہے، اللہ تمہیں اس سے فائدہ دے۔"
🐪 ابوسفیان کی طرف سے مدد کی درخواست
ادھر اس قافلے کے سردار ابوسفیان رضی اللہ عنہ تھے — یہ قریش کے بھی سردار تھے (اس وقت تک ایمان نہیں لائے تھے — فتح مکہ کے موقع پر ایمان لائے) — ان کی عادت تھی کہ جب ان کا قافلہ حجاز کی سرزمین پر پہنچتا تو جاسوسوں کو بھیج کر راستے کی خبریں معلوم کر لیتے تھے — انہیں آپ صلی اللہ علیہ و سلم کا خوف بھی تھا۔
چنانچہ ان کے جاسوس نے بتایا کہ آنحضرت صلی اللہ علیہ و سلم اس تجارتی قافلے کو گھیرنے کے لیے روانہ ہو چکے ہیں — یہ سن کر ابوسفیان رضی اللہ عنہ خوف زدہ ہو گئے — انھوں نے فوراً ایک شخص کو مکہ کی طرف روانہ کیا اور ساتھ ہی اسے یہ ہدایات دیں:
"تم اپنے اونٹ کے کان کاٹ دو — کجاوہ الٹ دو — اپنی قمیص کا اگلا اور پچھلا دامن پھاڑ دو — اسی حالت میں مکہ میں داخل ہونا — انہیں بتانا کہ محمد ﷺ اپنے اصحاب کے ساتھ ان کے قافلے پر حملہ کرنے والے ہیں۔"
ایسا اس لیے کیا — تاکہ مشرکین جلد مدد کو آ جائیں۔
🌙 عاتکہ بنت عبدالمطلب کا خواب
وہ شخص بہت تیزی سے روانہ ہوا — ابھی یہ مکہ پہنچا نہیں تھا — کہ وہاں عاتکہ بنت عبدالمطلب نے ایک خواب دیکھا — وہ حضور نبی کریم صلی اللہ علیہ و سلم کی پھوپھی تھیں (یہ معلوم نہیں ہو سکا کہ بعد میں یہ اسلام لے آئی تھیں یا نہیں — روایات میں اختلاف پایا جاتا ہے — کچھ روایات کہتی ہیں ایمان لے آئیں تھیں — کچھ میں ہے کہ انھوں نے اسلام قبول نہیں کیا تھا)۔
خواب بہت خوف ناک تھا — وہ ڈر گئیں — انھوں نے حضرت عباس رضی اللہ عنہ کو اپنا خواب سنایا — لیکن اس شرط پر سنایا کہ وہ کسی اور کو نہیں سنائیں گے — انھوں نے پوچھا:
"اچھا ٹھیک ہے — تم خواب سناؤ — تم نے کیا دیکھا ہے؟"
عاتکہ بنت عبدالمطلب نے کہا:
"میں نے خواب دیکھا کہ ایک شخص اونٹ پر سوار چلا آ رہا ہے — یہاں تک کہ وہ ابطخ کے پاس آ کر رکا (ابطخ مکہ معظمہ سے کچھ فاصلے پر ہے) — وہاں کھڑے ہو کر اس نے پوری آواز سے پکار کر کہا: 'لوگو! تین دن کے اندر اندر اپنی قتل گاہوں میں چلنے کے لیے تیار ہو جاؤ۔' پھر میں نے دیکھا کہ لوگ اس کے گرد جمع ہو گئے ہیں — پھر وہ وہاں سے چل کر بیت اللہ میں داخل ہوا — لوگ اس کے پیچھے پیچھے چلے آ رہے تھے — پھر وہ شخص اونٹ سمیت کعبہ کی چھت پر نظر آیا — وہاں بھی اس نے پکار کر یہ الفاظ کہے — اس کے بعد وہ ابوقبیس کے پہاڑ پر چڑھ گیا — وہاں بھی اس نے پکار کر یہ الفاظ کہے — پھر اس نے ایک پتھر اٹھا کر لڑھکایا — پتھر وہاں سے لڑھکتا پہاڑ کے دامن میں پہنچا تو اچانک ٹوٹ کر ٹکڑے ٹکڑے ہو گیا — پھر مکہ کے گھروں میں سے کوئی گھر نہ بچا جہاں اس کے ٹکڑے نہ پہنچے ہوں۔"
یہ خواب سن کر حضرت عباس رضی اللہ عنہ نے کہا:
"اللہ کی قسم عاتکہ! تم نے بہت عجیب خواب دیکھا ہے — تم خود بھی اس کا تذکرہ کسی سے نہ کرنا۔"
📢 خواب کا مشہور ہونا اور ابوسفیان کے قاصد کی آمد
حضرت عباس رضی اللہ عنہ وہاں سے نکلے تو راستے میں انہیں ولید بن عتبہ ملا — یہ ان کا دوست تھا — عباس رضی اللہ عنہ نے خواب اس سے بیان کر دیا اور وعدہ لیا کہ کسی کو بتائے گا نہیں۔
ولید نے جا کر یہ خواب اپنے بیٹے عتبہ کو سنا دیا — اس طرح یہ خواب آگے ہی آگے چلتا رہا — یہاں تک کہ ہر طرف عام ہو گیا — مکہ میں اس خواب پر زور شور سے تبصرہ ہونے لگا۔
آخر تین دن بعد وہ شخص اونٹ پر سوار مکہ میں داخل ہوا — جسے حضرت ابوسفیان رضی اللہ عنہ نے بھیجا تھا — وہ مکہ کی وادی کے درمیان میں پہنچ کر اونٹ پر کھڑا ہو گیا اور پکارا:
"اے قریش! اپنے تجارتی قافلے کی خبر لو — تمہارا جو مال و دولت ابوسفیان لے کر آ رہے ہیں — اس پر محمد ﷺ حملہ کرنے والے ہیں — جلدی مدد کو پہنچو۔"
🛡️ قریش کی جنگی تیاریاں
اس تجارتی قافلے میں سارے قریشیوں کا مال لگا ہوا تھا — چنانچہ سب کے سب جنگ کی تیاری کرنے لگے — جو مال دار تھے — انھوں نے غریبوں کی مدد کی — تاکہ زیادہ سے زیادہ افراد جنگ کے لیے جائیں۔
جو بڑے سردار تھے — وہ لوگوں کو جنگ پر ابھارنے لگے — ایک سردار سہیل بن عمرو نے اپنی تقریر میں کہا:
"اے قریشیو! کیا یہ بات تم برداشت کر لو گے کہ محمد ﷺ اور ان کے بے دین ساتھی تمہارے مال اور دولت پر قبضہ کر لیں — لہٰذا جنگ کے لیے نکلو — جس کے پاس مال کم ہو — اس کے لیے میرا مال حاضر ہے۔"
اس طرح سب سردار تیار ہوئے — لیکن ابولہب نے کوئی تیاری نہ کی — وہ عاتکہ کے خواب کی وجہ سے خوف زدہ ہو گیا تھا — وہ کہتا تھا:
"عاتکہ کا خواب بالکل سچا ہے — اور اسی طرح ظاہر ہوگا۔"
ابولہب خود نہیں گیا — لیکن اس نے اپنی جگہ عاص بن ہشام کو چار ہزار درہم دے کر جنگ کے لیے تیار کیا — یعنی وہ اس کی طرف سے چلا جائے۔
🚶 حضور صلی اللہ علیہ و سلم کا روانہ ہونا اور لشکر کی جانچ
ادھر خوب تیاریاں ہو رہی تھیں — ادھر آنحضرت صلی اللہ علیہ و سلم مدینہ منورہ سے روانہ ہوئے — مدینہ سے باہر بئر عتبہ نامی کنویں کے پاس لشکر کو پڑاؤ کا حکم فرمایا — آپ صلی اللہ علیہ و سلم نے صحابہ کرام رضی اللہ عنہم کو اس کنویں سے پانی پینے کا حکم دیا اور خود بھی پیا۔
یہیں آپ صلی اللہ علیہ و سلم نے حکم فرمایا:
"مسلمانوں کو گن لیا جائے۔"
سب کو گنا گیا — آپ صلی اللہ علیہ و سلم نے سب کا معائنہ بھی فرمایا — جو کم عمر تھے — انہیں واپس فرما دیا۔
واپس کیے جانے والوں میں شامل تھے:
حضرت اسامہ بن زید
رافع بن خدیجہ
براء بن عازب
اسید بن زھیر
زید بن ارقم
زید بن ثابت — رضی اللہ عنہم
جب انہیں واپس چلے جانے کا حکم ہوا — تو عمیر بن ابی وقاص رضی اللہ عنہ رونے لگے — آخر آپ صلی اللہ علیہ و سلم نے انہیں اجازت دے دی — چنانچہ وہ جنگ میں شریک ہوئے — اس وقت ان کی عمر 16 سال تھی۔
*ⲯ﹍︿﹍︿﹍ⲯ﹍ⲯ﹍︿﹍☼*
cxxx{}::::::::::::جاری ہے:::::::::::::::>
کوئی تبصرے نہیں:
ایک تبصرہ شائع کریں